Hei Hå

Sei Hei til Hå i sommar, og bli kjent med dei flotte turområda i kommunen. Turkortet har ti turar og ti tips til aktivitetar. Turane er spreidde rundt i kommunen og alle som går tre eller fleire turar får medalje. I tillegg blir det trekning av årskort på Jærmuseet. Ta på krone og gå Kongevegen, lag ein H i naturen eller utforsk tunellane på Vedafjell med lommelykt.

• Her kan du skaffa deg årets turkort og ta med barna på tur

Tell tur

TellTur er friluftsrådet sin elektroniske postkassetrim. Her kan du finna turmål og registrera resultata dine. Du kan konkurrera med seg sjølv eller med andre turgåarar om å nå fleire mål! Bruk dette kartet for å sjå kva turmål du kan finna.

Strandliv og bading

Våre spektakulære strender byr alltid på sand mellom tærne, bølgeskvulp og herleg sjøluft.  I Hå har me nokre av dei flottaste strendene i landet frå Sirevåg i sør til Refsnes i nord. 

• Sannarvågen er ei fin lita badestrand nær Sirevåg sentrum. Du kan koma deg til stranda med både bil og tog.
• Ognasanden ligg mellom svaberg, fjellknausar, elveos. Parker ved parkeringsplassen Tanginen eller ta toget til Ogna stasjon.
• Laugabergvika er ei av fleire små viker på Ogna. Her er det offentleg toalett. Parker ved parkeringsplassen Tanginen eller ta toget til Ogna stasjon. 
• Holmasanden er ei skjult perle med campingsplass og kiosk like ved. Det er offentleg parkering ved parkeringsplassen Tanginen. Du kan også ta toget til Ogna stasjon.
• Brusanden er ei lang og flott sandstrand mellom med lune sanddyner, lagune og elveos. Det er lett å koma seg til stranda med både bil og tog. Parkeringsplassenen ligg på nordsida av stranda og toget stoppar på Brusand stasjon. Det ligg campingplassar med kioskar i begge ender av stranda. Ver spesielt obs på farlege understraumar i sjøen.
• Kvalbeinsanden er ei fin sandstrand nord for Brusanden. Du kan parkera på den offentlege parkeringsplassen på Brusand eller ved Kvassheim fyr.
• Nærland strand er ei rullesteins- og sandstrand. Det er parkering ved Nærlandsparken 300 meter frå stranda.
• Refsnes strand er ei rullesteinstrand i nord med sanddynekyst i sør. Stranda er fredeleg med kort avstand til offentleg parkeringsplass og offentleg toalettanlegg med utedusj, skyllestasjon og benk til å sitta på. Det er svillesti frå toalettbygget ned til sanddynene.

Det er fint bada på alle strendene, men ver merksam på sterke understraumar i sjøen. Me har også andre  badeplassar i kommunen. Hå kommune målar kvaliteten på badevatnet fleire plassar gjennom sommaren. Det blir sett opp skilt om kvaliteten på vatnet ikkje er akseptabel.

• Badeplassar: Du finn kart over badeplassar, parkering og toalett her.

​

Sommartilbod for barn og unge

Barn i juli

Barn i juli er eit gratis ferietilbod for dei som startar i 4. klasse til dei som startar i 7. klasse. Det føregår kvar vekedag mellom klokka 09.30 og 12.00 3.-28. juli på Hå kulturtorg, Nærbø. 21. juli er me i Sirevåg på Tall Ship-fest.

• Kva:
  Mange ulike aktivitetar inne og ute, og gratis mat til alle. 

Ung i juli

ng i juli er eit gratis ferietilbod for ungdom som skal starta i 8. klasse og opp til 18 år. Det føregår kvar vekedag mellom klokka 12.30 og 15.30 3.-28. juli på Hå kulturtorg, Nærbø. 21. juli er me i Sirevåg på Tall Ship-fest.

Her kan du spela instrument, dansa, spela brettspel, teikna, drøsa, syngja og vasa. Du kan treffa andre å ha lag i, møta nye vener, testa nye hobbyar og ha det gildt. Enkel servering av brødmat. 
 

Meir informasjon:

Barn i juli - Hå kulturskule

Ung i juli - Hå kulturskule

Tall ships races

Ta turen til fantastiske Sirevåg den 21. juli. Då blir det skutefest i Sirevåg i kjend stil!

Her finn du meir informasjon

Hå gamle prestegard og Obrestad fyr

Obrestad fyr er 150 år i år og Hå gamle prestegard feirar 40-årsjubileum. Ta deg ein tur innom i sommar og opplev fleire spennande utstillingar. Turterrenget er fantastisk uansett ver, og legg gjerne ein tur innom hagen til prestegarden og smak på urter som blir brukt i kafeen. I kafeen kan du slappa av, nyta maten, atmosfæren og utsikta utover havet. Kafeen har også eit kjekt leikerom for barn. I kunstbutikken er det alltid noko nytt og å finna til deg sjølv eller som ei unik gåve.

Opningstider i juli og august:

• Hå gamle prestegard: Laurdag og sundag klokka 12-17 og Tysdag til fredag klokka 11 – 17.

• Obrestad fyr tysdag til sundag klokka 12-17.

Hå gamle prestegard: Sjå nettsidene for meir informasjon 

Sykla Jærruta

Har du lyst til å oppleva Jæren og Hå på ein ny måte? Sjekk ut Jærruta! Trø i veg på el-sykkel med vind i håret og kraft i tråkka. Besøk for eksempel Hå Gamle Prestegard, Vitengarden, Ystepikene, Ogna Golfklubb, Grønefed Kulturtun eller Pauserommet på vegen. Overnatt på hotell, fyr, campingplassar eller kanskje i ei tretopphytte!

Nå er ruta ferdig skilta og klar for å ta i mot deg!

• Her finn du kart over ruta

Fisking 

Det er gode moglegheiter for fisking både i Brattlandsåna og i Nordre Varhaugselva på Varhaug. 

Du kan fiska på sørsida av Brattlandsåna langs den kommunale turstien.

Jæren jakt- og fiskelag sel døgnkort. Prisen er 80 kroner for medlemmer, og 120 kr dersom du ikkje er medlem.

Ungdom opp til 18 år kan fiska gratis.

Fisketida er frå 15. juli til 31. august.

I Elveguiden finn du meir informasjon om fiskesesongen

Sommaraktivitetar på Vitengarden

Det er mykje å finna på for små og store på Vitengarden, og desse vekene i sommar skjer det litt ekstra:

• 26. juni - 30. juni: Vikingsnor
• 3. juli - 7. juli: Beebot
• 10. juli - 14. juli: Insektshotell
• 17. juli - 21. juli: Bygg med lego
• 24. juli - 28. juli: Kjemisk måleri
• 31. juli - 4. august: Vikingsnor
• 7. august -11. august: Bygg med erter og tannpirkarar

Du finn meir informasjon på Jærmuseet sine nettsider.

Utlån av frilutfsutstyr

Treng du telt, hengekøye, utstyr til matlaging ute eller kanskje ein kano? På frilager.no kan du leiga friluftsutstyr til turar og arrangement. I Hå kommune er det to hentebuer du kan plukka opp utstyret i. Den eine står på parkeringsplassen nær Torlandsvegen 14 ved idrettsanlegget på Nærbø og den andre står ved idrettsanlegget på Varhaug ved innkøyringa frå Opstadvegen 583.

Sommarles.no på biblioteka i Hå

Har du barn som skal starta i 1. klasse eller går i 1. til 7.-klasse? Bli med på lesekampansjen Sommarles! Barna kan laga seg ein profil og registrera alt dei les frå 1. juni til 31. august. 

• Barna får poeng for kvar side dei les.
• Barna får tilgang til ei spesialskriven forteljing av forfattar Mari Moen Holsve.
• Kodeord vert hengt opp utanfor biblioteket kvar måndag.
• I tillegg til poeng, kan barna også gjere seg fortente til digitale trofé og kule premiar.
• Premiar kan hentast på biblioteket når ein kjem til level 10, 20 og 30. Dei som kjem til level 40 eller høgare, er med i trekninga av gåvekort på frozen yoghurt.

Her finn du opningstidene til biblioteket i sommar.