Tilsyn med radon i utleigebustader

Leiger du ut bustad? Hausten 2025 skal det gjennomførast tilsyn med radon i utleigebustader i Hå kommune. 

Alle som leiger ut bustad skal kunna dokumentera at radonnivåa i utleigebustaden er under grensene. Dersom nivåa er for høge, er utleigar ansvarleg for å gjera tiltak mot radon. Dette er eit krav i strålevernforskrifta og gjeld alle typar utleigebustader, både offentlege og private.

Korleis skal det førast tilsyn?

Det vil førast tilsyn med:

  • om utleigarar har målt radon
  • om målinga er gjennomført etter måleprosedyren 
  • om det er gjennomført tiltak ved for høge verdiar
  • om leigetakar er informert om radonnivåa i bustaden

Har du ennå ikkje målt i utleigebustaden din?

Då har du sjansen til å gjera det nå i vinter. For at ei radonmåling skal kunne godkjennast, må den vera gjennomført etter DSAs måleprosedyre. Radon skal målast i ein periode på minimum to månader i løpet av målesesongen, som er frå midten av oktober til midten av april.  Leigetakar har også krav på å få dokumentasjon på radonnivåa.

Ved spørsmål om korleis ei måling gjennomførast, sjå DSAs nettsider:

Slik måler du radon

Kvifor er det viktig å måla radon?

Å pusta i luft som inneheld radon, aukar risikoen for å få lungekreft. Risikoauken blir bestemt av kor lang tid du blir utsett for radon og av kor høgt radonnivået er. Radon i inneluft er den vanlegaste årsaka til lungekreft etter røyking, og medverker årleg til rundt 400 lungekrefttilfelle i Noreg.

Kva er grensene for radon?

Jo lågare radonnivåa er, jo lågare er lungekreftrisikoen. Difor bør radonnivåa alltid vera så låge som praktisk mogleg. Tiltaksgrensa er 100 Bq/m3 og grenseverdien, som er ei øvre grense, er 200 Bq/m3. Dette betyr at dersom du måler radonnivå høgare enn tiltaksgrensa, for eksempel 150, 400 eller 2000 Bq/m3, må du gjera tiltak mot radon. Tiltaka må dokumenterast.

Har du spørsmål?

Ta kontakt med rådgivar i miljøretta helsevern:

Kjersti Lea Sletten

mobil:  97 65 89 39

e-post: kjersti.lea.sletten@rogbr.no

Tilsynskampanjen er i regi av Direktoratet for strålevern og atomsikkerheit (DSA), men det er kommunane som gjennomfører tilsyn lokalt. 

Meir informasjon om regelverket finst her: dsa.no/radon

Raudt lite hus på ein åskam - Klikk for stort bilete