Desember er høgsesong for selskap og sosiale samankomstar, men også for sjukdommar som gir luftvegsinfeksjonar og omgangssjuke. Legevakta må prioritera dei som er sjukast og treng øyeblikkeleg hjelp. 

Ring derfor alltid 116117 for råd og rettleiing, før du møter opp på legevakta. 

Blir du sjuk, bør du ta det med ro heime, ta febernedsettande ved behov og drikka rikeleg med væske. Treng du ei legevurdering utan at situasjonen er kritisk, anbefaler me at du kontaktar fastlegen neste kvardag.

Legevakta behandlar pasientar som treng øyeblikkeleg hjelp ved akutt sjukdom. Legevakta er for alle, men ikkje for alt.

Husk å fornya reseptar

Leiaren på legevakta minner om at alle bør fornya reseptar på faste medisinar i god tid før jul og sørga for at dei har nok medisinar i hus til over nyttår. Ho anbefaler også å kjøpa inn både febernedsettande medisin og nasespray til både vaksne og barn. 

I tillegg er det viktig at du held deg heime når du er sjuk, for å unngå smittespreiing både på jobb og i selskap. God hand- og hostehygiene er framleis viktig for å redusera risikoen for å bli sjuk, er rådet frå kommuneoverlegane. 

Sjå også FHI sine smittevernråd ved luftvegsinfeksjonar

Råd til foreldre med sjuke barn

Her er nokre gode råd til foreldre som skal ivareta barn som blir sjuke i julehøgtida:

• Gi barnet rikeleg med drikke.
• La barnet vera lett påkledd ved feber, slik at det kan verta kvitt overflødig varme.
• Gi saltvass- eller nasespray ved tett nase.
• Gi febernedsettande medisin som Paracet/Ibux dersom barnet har ubehag eller er smerteplaga. Febernedsettande gjer ikkje barnet fortare frisk, men det vil lindra ubehag og føra til at barnet lettare får i seg drikke. Obs! Gi dosar til barnet etter pakningsvedlegget og barnet si vekt, og ikkje etter alder.
• Ved hoste, luftvegsplager og/eller øyreverk: La barnet ligga med heva overkropp om natta. Legg for eksempel nokre klossar eller bøker under sengebeina i hovudenden.
• Opptre roleg og trøyst barnet ved pustebesvær. Ved falsk krupp og astma, bør du la barnet sova i eit kjølig rom – og ta gjerne barnet ut i kald og frisk luft ved anfall.

Kontakt fastlege, eventuelt legevakt på telefon 116117, viss barnet:

• Er under tre månader og har feber.
• Har dårleg allmenntilstand, er slapp og ikkje får i seg nok drikke.
• Strevar med å få luft og/eller pustar raskt.

Treng du sjukemelding? 

• Ta kontakt med fastlegen din.
• Det er berre utanlandske arbeidstakarar og dei utan fastlege som får sjukemelding på legevakta.

Med ønske om ei fredeleg og frisk førjulstid!

Helsing kommuneoverlegane Gerd Signy Omland, Roman Benz, Øystein Fjetland Øgaard og leiar på legevakta, Monica Orstad.