Barn/Ung i juli fekk Folkehelseprisen 2024 i Rogaland. Frå venstre Sirwan Saadun i Alle med i Hå, ordførar Andreas Bjorland, prosjektleiar Thilde Skretting, leiar Hå kulturskule Ragnvald Wernøe, styreleiar Hanne Eik Nasjonalforeningen for Folkehelse Rogaland og leiar for ungdomsklubbane i Hå, Anette Jensen Gimre.Nasjonalforeningen for folkehelsen deler kvart år ut ein folkehelsepris i kvart fylke, og i år stakk det populære sommarferietilbodet i Hå av med gjev førstepremie.
I kriteria til folkehelseprisen står det at prisen bør gis til nokon eller noko som:
- Bidrar til sosial støtte, nettverk og aktivitet som skaper trivsel og livskvalitet
- Bidrar til gode nærmiljø
- Bidrar til inkludering og bekjempelse av utenforskap
- Skaper generasjonsmøte og aktivitetar på tvers av generasjonar
- Har hatt stor betydning for folkehelsa og sosiale forhold i nærmiljøet
Viktig folkehelsearbeid
Ifølge styreleiar Hanne Eik som delte ut prisen, oppfyller Barn/Ung i juli alle desse kritieria.
- Me er både imponerte og stolte over arbeidet som blir drive. Dette er eit viktig folkehelsearbeid, seier Eik.
Leiar for Hå kulturskule, Ragnvald Wernøe mottok prisen, og nytta sjansen til å takka det breie laget som står rundt og gjer sommarferietilbodet mogleg.
10.000 besøkande
Ung i juli blei starta av Hå kulturskule i 2019. Dei fekk med seg ungdomsklubbane i Hå for å gjennomføra tiltaket. Bakgrunnen var at dei såg eit behov for eit tilbod om sommaren; Eit tilbod utan krav til påmelding og med plass til alle. Sommarferien er lang for veldig mange barn og unge. I løpet av dei fem somrane har tilbodet hatt innom 10.000 barn og unge.
Ordførar Andreas Bjorland roser tilbodet:
- Det å vera i lag, er livsviktig. Her er det mange engasjerte tilsette og frivillige som brenn for fellesskapet og for barn og unge. Dette heier me veldig på, seier Bjorland.