Ragnvald Wernøe
Frode Ueland for Hå kommune
Som komponist, arrangør og kulturformidlar har han skapt ei rekkje produksjonar som har nådd både barn og vaksne, og han har vore ein viktig pådrivar for samarbeid mellom profesjonelle kunstnarar og lokale utøvarar.
Wernøe har markert seg med eigne musikkutgjevingar og større produksjonar som Sirkus Vaudeville in Symphony, Nattergalen og Frans av Assisis bøn, Historien om votten og Monster under senga. Gjennom samarbeid med mellom andre Britt-Synnøve Johansen, Opera Rogaland, Solveig Bergersen, Frank Robert Andreassen, Jæren Symfoniorkester og ensemblet Insimul har han skapt kunstnarlege opplevingar av høg kvalitet, som òg fått nasjonal merksemd.
Han har i ei årrekkje formidla kultur til barn gjennom deltaking på festivalar og med turnear i Den kulturelle skulesekken, og med prosjekt som Sirkus Vaudeville og Songkista har han nådd publikum over heile regionen.
Gjennom eit brennande engasjement, stor arbeidskapasitet og eit varmt hjarte for menneske har Ragnvald vore ein sentral drivkraft i utviklinga av kulturlivet i kommunen. Som leiar av kulturskulen har han lagt til rette for at barn, unge, vaksne og eldre skal få oppleve meistring, fellesskap og kulturglede. Samstundes har han vist ein særleg evne til å sjå den enkelte og skapa rom for at menneske med ulike talent og interesser kan få utfalde seg.
Wernøe har gjennom ei årrekkje vore initiativtakar, pådrivar og samarbeidspartnar i mange kulturprosjekt og arrangement. Han har medverka til å skapa store felles opplevingar gjennom arrangement som Tall Ships i Sirevåg, Juleparken og sommartilbod for born, samstundes som han arbeider for at lokale kunstnarar, musikarar, kulturutøvarar og elevar skal få synleggjera og utvikla sine talent. Enten det gjeld songstunder for eldre, Demenskoret, kulturtilbod for barn eller nye satsingar i kulturskulen, arbeider han for at kultur skal vera tilgjengeleg og meiningsfullt for alle.
Gjennom sitt kunstnarlege virke, sitt engasjement for barn og unge og si evne til å skapa nye møteplassar for kultur, har Ragnvald Wernøe ytt eit særs verdifullt bidrag til kulturlivet i Hå og langt utover kommunegrensene.
Prisen vert delt ut på ordføraren si nyttårsmottaking 1. januar 2027.