Festivalen blir opna på Bryne Kro & Hotell fredag 11. september. Programmet omfattar mellom anna fotokåseri om fuglelivet på Jæren, reiselivsseminar og kåring av dei beste bileta i festivalen sin fotokonkurranse.
Opplev fuglelivet på nært hald
Jæren er eitt av dei viktigaste områda for fugleliv i Noreg, og festivalen gir ei unik moglegheit til å oppleve naturen saman med erfarne fugleguidar. På programmet står mellom anna fuglekikking ved Orrevatnet, Kvassheim fyr, Sømmevågen og Tungenes fyr.
Ved Kvalbein på Brusand blir det ringmerking av fuglar både laurdag og søndag. Her kan publikum lære meir om fugletrekk og forsking på fuglebestandar.
Aktivitetar for heile familien
Festivalen har også fleire tilbod for barn, unge og familiar. På Friluftshuset på Orre blir det quiz, fargelegging og fuglekort, medan søndagen byr på familieaktivitetar med fugletema på mellom anna Kvassheim fyr og Friluftshuset på Orre.
For dei som ønskjer å lære meir om naturfotografering, blir det fotosafari med Vegard Hanssen. Festivalen rundar også av laurdagen med fuglepøbb og det arrangørane omtalar som verdspremieren på fuglekaraoke.
Meld deg på
Nokre av aktivitetane har avgrensa tal på plassar, og arrangøren oppmodar interesserte om å melde seg på i god tid. Påmeldingsfristen er torsdag 10. september klokka 16.00.
Du finn heile programmet og påmelding på nettsidene til Jæren Fuglefestival.