​Jærstrendene er spennande turmål uansett ver. Her kan du gå barføtt, bada, leika med spann og spade, plukka søppel, finna skattar, hoppa frå sanddyner, spela hagespel, fly med drage eller surfa. Hå kommune har mange spennande strender. Her finst både røffe steinstrender og  vakre sandstrender: I sør finn du sandstrendene Sannarvågen, Holmasanden, Ognasanden, Brusanden og Kvalbeinsanden, og i nord ligg Nærlandsstranda og Refsnesstranda. 

På veg til Refsnes strand Sofie Gudmestad

🅿️Parkering: 

Refsnesstranda, Nærlandsparken, Kvassheim fyr, Tanginen, Brusand nord, Ogna camping og Sannarvågen.

🚈Tog:

Brusand stasjon, Ogna stasjon eller Sirevåg stasjon

🌳 Turbeskrivelse: 

Jærstrendene er landskapsvernområde, og delar av strendene er også verna plante- og fuglefredningsområde. All ferdsle i verneområda skal skje til fots. Du bør gå på strandflata og ikkje i sanddynene. Å gå på strandbeltet ytst mot havet gjer ikkje skade, men sanddynene som ligg like bak er den mest sårbare delen av landskapet. Nytt turen til å bli glad i naturen! Vis respekt for han.

🚻 Toalett:
Det er offentleg toalett ved Ognasanden, Brusanden og Refsnesstranda. På Refsnes er det også utedusj, skyllestasjon og benk til å sitta på ved toalettanlegget. 

💡Turtips:
Skriv ein H i stranda og send inn bilde til hei@ha.kommune.no.

🗺️ Lenke til kart over badeplassar i Hå kommune

Steinkjerringa er ein folkekjær skulptur som har speida utover jærlandskapet heilt sidan 1927. Steinkjerringa blei opprinneleg kalla Mor Norge. Ungdommar frå Nærbø brukte to vintrar på å slepa Steinkjerringa til Synesvarden landskapsvernområde kor ho står i dag. Turen opp til frå Holmavatn misjonssenter går gjennom brunfarga lyng- og myrterreng på blåmerka sti. Turen er cirka 3 kilometer kvar veg. Rekn med 1 time til 1,5 timar til Steinkjerringa.

Steinkjerringa har et godt fang å sitte i. Monica Gausland

🅿️Parkering:
Holmavatn. Ta Fylkesveg 44 til Varhaug, og vidare på på Riksveg 504 til Ualand. Sving av til venstre og køyr vidare til Holmavatnet.

🚈Tog:
Ikkje anbefalt.

🌳 Turbeskrivelse:
Følg kjerrevegen mot sør og vidare på god sti merka med blå markeringar. Terrenget er lettgått med lite kupering. Du kan velga om du vil ta returen same vegen eller følga merkinga til Synesvarden og ta ein fin rundtur på Høg-Jæren.

💡Turtips: 
Steinkjerringa har et trygt fang du kan sitte i og er eit populært fotomotiv.

🗺️ Lenke til kart

Langs Jærkysten kan du følga tråkk etter folk og fe gjennom mange tusen år. Spor av den forhistoriske holvegen og den historiske Kongevegen frå 1600-tallet følgjer delvis turstien som har fått namnet «Kongevegen», som går frå Nærland til Sirevåg. Opplev den fantastiske jærkysten langs Kongevegen. Her kan du finna skattar, møta dyr og vera nær havet uansett kor du går. Dersom du startar ved Hå gamle prestegard kan du ta ein tur innom leikerommet etter turen eller kjøpa noko godt i kafeen. Andre flotte plassar å besøka langs Kongevegen er Obrestad fyr, Grødalandstunet, kvernhusa og tørkehuset ved Bodle, Varhaug gamle kyrkjegard og stormhytta i Madland havn. 

🅿️Parkering:

Hå gamle prestegard, Obrestad havn, Grødalandstunet eller Varhaug gamle kyrkjegard.

🌳 Turbeskrivelse:
Du kan starta og slutta turen på ulike stadar, men nokre anbefalte strekk er:

• Hå gamle prestegard – Obrestad havn
• Obrestad havn – Grødalandstunet
• Grødalandstunet – Varhaug gamle kyrkjegard
• Varhaug gamle kyrkjegard - Madland havn

Frå Hå gamle prestegard til Kvassheim er turstien merka som kystveg med blå staker.

🚈Tog:
Ta toget til Brusand og gå nordover mot Kvassheim fyr eller sørover mot Varden. Her er ikkje turen merka som kystveg med blå stakar..

💡Turtips: 
Ta på ei krone og gå på Kongevegen som ein konge eller små prinsar og prinsesser. Kongevegen blir av mange rekna som juvelen i krona langs Jærkysten. Vegen heiter Kongevegen sidan kongen bestemte ridevegar skulle utvidast til kjørevegar for kjerre og vogn. Kongen bestemte også at det skulle byggast bruer over elver, og over heile Norge har vegane som blei laga på den tida fått namnet Kongeveg. Fram til 1700-talet var Kongevegen hovudvegen mellom Stavanger og Ogna. Vegen skal ha blitt besøkt av kongelege nokre få gongar.

🗺️ Lenke til kart
Du finn 14 turstrekningar med kart og spennande skildringar i turboka Kongevegen i Hå.  Du kan kjøpa boka på Hå gamle prestegard og på Hå rådhus.

Har du lyst til å gå på topptur med heile familien i Hå? Legg turen til Borgåsen, eit spesielt fjell like aust for Helgåvatnet på Ogna. Turen er cirka 2,5 kilometer tur retur. Du kan rekna ein snau time til toppen. Her får du fin utsikt og kan sjå restar av ein stor forsvarsmur på austsida av toppen. 

🅿️Parkering:
Ved bommen til Helgå hyttegrend eller Ognatun. Følg skilt til Ognatun frå Fylkesveg 44 nord for Ogna sentrum.

🚈Tog:
Ein halvtime å gå frå Ogna stasjon

🌳 Turbeskrivelse:
Følg asfaltvegen forbi bommen og opp bakken, forbi vatnet på venstre side. Ta til høgre og følg vegen sørover gjennom hyttefeltet og vidare på merka sti.

💡Turtips:
Eit tips for at små føter skal koma seg opp til toppen på ein gild måte er å leika gøymeleiken på vegen. Ein flott gøymestad er ein svær og spennande hellar du finn på vegen.

🗺️Lenke til kart

Tenk at akkurat du har ei hytte i Hå. Dagsturhytta er di! Bruk hytta inne og ute og så ofte du vil. Dagsturhytta i Hå er plassert på ein fin utsiktsplass langs den Vestlandske hovedveg, sørvest for Tvitjørn. Hugs at det også er alle andre si hytte, så respekter at andre kan bruka hytta mens du er der. Ta av skoa når du går inn og forlat hytta slik du vil finna ho sjølv.

🅿️Parkering: 
Ogna skule 

🚈Tog:
Ta toget til Ogna stasjon og gå i cirka 10 minutt til Ogna skule. Derifrå er turen skilta.

🌳 Turbeskrivelse: 
Turen er godt skilta frå parkeringsplassen på Ogna skule. Kjem du med tog må du gå av ved Ogna stasjon. Frå Ogna skule følger du skilt austover og vidare til høgre forbi gartneriet inn på den Vestlanske hovudveg. Turvegen er asfaltert og snor seg heile vegen over til Heigrestad. Turen frå Ogna inn til Tvitjørnhytta er rundt tre kilometer. Du kan rekn ein liten time kvar veg. Tilkomsten er universell utforma, men det er nokre bakkar undervegs som krev skryvekraft eller gode batteri.

💡Turtips: 
I hytta kan du eta matpakka di, varma deg ved peisen og kosa deg med bøker frå hyttebiblioteket. 

🗺️ Lenke til kart

Har du barn som er opptatt av historie eller elskar mystikk? Minna frå krigen vert levande og nære på Vedafjell. Sjølv om kanonar, artilleri, kasernar og ikkje minst soldatar er vekk for lenge sia, er anlegget i så god stand at du kan få med noko av alvoret til krigen når du besøker Vedafjell. Fjellet er nemleg heilt gjennombora. Her er mørke tunnellar i alle retningar og fleire bunkersar. Det er lett å gå seg vill inne i mørket, så barn må alltid gå saman med ein vaksen. Pakk også med ei god matpakke, og nyt denne og utsikten frå toppen av Vedafjell etterpå.

🅿️Parkering: 
Vedafjellet

🚈Tog: 
Vedafjellet ligg 10 minutt frå Sirevåg stasjon

🌳 Turbeskrivelse: 
På parkeringsplassen står det eit stort skilt med kart og skildring av heile anlegget. 

💡Turtips: 
Ta med lommelykt. I bunkersane er det litt fuktig, og det kan derfor vera lurt å ta med støvlar også.

Hanabergmarka er eit friområde som høyrer til Vitengarden som er eit av Jærmuseet sine flotte anlegg. Her kan du testa ut aktivitetar som orientering og geocaching i et område fylt av fornminne, kulturminne og gravhauger. 

Rune Helliesen

🅿️Parkering: 
Vitengarden 

🚈Tog:
Cirka 20 minutt å gå frå Nærbø stasjon

🌳 Turbeskrivelse: 
Frå Vitengarden går du gjennom ei grind og følger skiltet inn i Hanabergmarka. Her kan du velga mellom tre merka turløyper: Naturløypa, Krigsminneløypa og Fordtidsløypa.

💡Turtips:
På Vitengarden kan du henta orienteringskart og prøva deg på orienteringsløypa i Hanabergmarka. Besøk gjerne Vitengarden i same slengen. Her kan du prøva deg som dyrlege i småfeklinikken, møta dyr, hoppa i høyet, vera med på ei reise gjennom kua og verkeleg få oppleva kor maten kjem frå. Du kan også kjøpa noko godt i kafeen.

Nærbøparken er ei grøn perle midt i Nærbø sentrum. Her kan du gå på kafé, plukka frukt og bær, leika og besøka endene i dammen. 

Foto: Evy Vigre Reime Evy Vigre Reime

🅿️Parkering:
Nærbøparken

🚈Tog:
Cirka 10 minutt å gå frå Nærbø stasjon

🌳 Turbeskrivelse: 
Det er to små rundar på grusveg inne i parken. Ein ytre runde og ein indre runde. Dersom du ønsker å gå ein lenger tur, kan du gå den merka nærturen frå Nærbøparken til Dalabekk. Dette er ein fin rundtur som går innom begge dei flotte parkområda på Nærbø. I Nærbøparken finn du ein kafe som selger vaflar, is, kaffi og litt kioskvarer. Kafeen blir drive av frivillige og har ikkje faste opningstider. Sjekk Facebook-sida til Nærbøparken før du tek turen for å sjå om det er ope. 

💡Turtips:
Dersom kafeen er open, kan du henta parkbingo i kafeen. Då får du eit ark med ting du skal finna i parken. Lever arket i kafeen når du er ferdig for å få premie.

Turen langs Brattlandsåna på Varhaug er enkel å gå på turveg med grus, og passar både for rullestolbrukarar og barnevogner. Du finn sittebenkar leikeplass og krossløype langs elva.

🅿️Parkering:
Varhaug idrettsanlegg

🚈Tog:
Det er cirka 20 minutt å gå til idrettsanlegget, men om du vil gå ein raskare veg ned til Brattlandsåna, kan du ta stasjonsvegen til Møllevegen. Då er det berre 7 minutt å gå.

🌳 Turbeskrivelse: 
Turen langs Brattlandsåna på Varhaug er ein av nærturane som er merka i samarbeid med Jæren turlag. Turen startar ved Varhaug idrettanlegg og går langs elva.

💡Turtips: 
Test frisbeegolfbanen langs Brattlandsåna.

🗺️ Lenke til kart

I Haugstadskogen på Vigrestad er det ly å finna og mange stiar å velga mellom.

🅿️Parkering: 
Haugstadskogen

🚈Tog:
Frå Vigrestad stasjon er det merka ei løype fram til Haugstadskogen. Det er cirka 40 minutt å gå.

🌳 Turbeskrivelse: 
Noko av det første du møter i Haugstadskogen, er ei stor oppslagstavle som viser alle stiar og sitteplassar i skogen. Her er både lysløype, turveg utan lys og smale stiar der du nærast må krypa inn i granskogen. Enkelte stadar er det så tett at det vert mørkt på solskinnsdager. Men du finn òg meir opne område, gapahukar og annan vegetasjon.

💡Turtips:
Haugstadskogen begynner på H som er Hå kommune sin bokstav. Klarer du å finna noko i skogen som begynner på H? Send gjerne bilde til hei@ha.kommune.no.